Авамның ынак оглу
Эдектери орлуп калган шинель кеткен,
Эдик-хеви кызыл-мыңгы — балыгланган,
Эрги хынныг ланчыы чүктээн орус кижи
Эрик кыдыы кезек өгге халдып келген.
Аалга турган чаңгыс кадай корга бергеш,
— Аалың кайдал, адың кымыл, чүге чор сен?
Кандыг албан ужурунда халдып үнгеш,
Кайы суму чедериң? — деп айтырыпкан.
— Алыс чуртум орус чурту, ырак, угбай,
Адым-шолам: орус оглу Огонек дээр.
Аалың ишти канчап барган, чүге чогул?
Аралажып таныжар дээш келдим — диген.
Орус мен деп сөстү дыңнааш, актар сактып,
Онза кайгап, кара бодап, өскелексеп,
Бөргүн көрүп олурарга, сылдыс чайнаан,
Бөдүүн, чазык арнын көргеш, хөңнү чымчаан.
— Аалым ишти, ажы-төлұм — дөгерези
Ары-бөрү аглай берген, мында чогул.
Удавайн чедип келир, манап ор — деп,
Удур көрбейн, арай чажыт харыы берген.
Орус кижи улам чазык каттырыпкаш,
Олурбайн, далаш-биле аъттаныпкан.
Кадай үнгеш, көрүптерге, ырак эвес
Хамык шериг хайнып эртип турар болган.
Кадай ол-ла кайгап-харап чоруп турда,
Хамык чону — оглу, кызы дөгерези
Демги келген шериг-биле каттыжыпкан,
Демниг, күштүг тиилеп турар, мындыг болган.
Бир-ле катап улуг оглу Опай-биле
Биеэги-ле орус кижи кады келген.
Бөргүн көрүп олурарга, сылдыс чайнаан,
Бөдүүн арнын база көргеш хөңнү чымчаан.
Ужурашкан санында-ла улам танып,
Ужа, төжүн салып берип, эргеледип,
Орус кижи ынчап тура, ынак оглу
Опайы дег, хөлчок ынак оглу болган.
Чудагыже тулчуп тургаш, тиилеп үнгеш,
Чуртталганың орук, эжиин ажыдышкаш,
Огонек оон чуртундува чана берген,
Ол-ла хевээр утпас ынак оглу болган.
© Степан Сарыг-оол