"Тыва кижиниң үш доюн эрттирериниң чуруму" деп номдан үзүндү:
...
Хая дег эттиг,
Хараган дег малдыг бол, уруум
Торлаа дег өнер бол,
Торга дег кыстыг бол, уруум.
Аъттанган аъдың чыраа болзун,
Азынган эдиң алдын болзун, уруум.
Эзертээниң чыраа болзун,
Эдилээниң мөңгүн болзун, уруум.
Хараганныг хову кежир кылаштава,
Кокай кончуг эвеспе, уруум.
Ажынгаштың арт ажыр кылаштава, уруум,
Адыг кончуг эвеспе, уруум.
Урууңну ыглатпайн өстүр,
Улугну хундулеп чору, уруум.
Ине сыптаар кыстыг бол, уруум.
Бак сөстү бажын ажыр,
Эки сөстү эктиң ажыр салып чор, уруум.
Үнген-киргениңни
Хүндүлеп чор.
Ушкан-турганын тургузуп чор,
Кирген кижи куруг үндүрбе,
Чанган кижини үдеп чор уруум.
Аалыңга кээр
аалчылыг бол,
Аалдап чоруур кыстыг бол, уруум.
Алаңгы эдээн ажы-төлү чаза базар болзун!
Соңгу эдээн анай-хураганы чаза базар болзун!
Челип четпес
Челелиг болзун.
Шаап четпес
Коданныг болзун.
Баштаңгызы маңнык-торгу болзун,
Бастырганы чыраа-саяк болзун!
Эзертээни челер-маңнаар болзун,
Эдилээни алдын-мөңгүн болзун!
Торга ышкаш каас болзун,
Торлаа ышкаш өнер болзун!
Намзырай дег бай болзун,
Найдың дүү дег
Өнер болзун!
Улагга мунар
Аъттыг болзун.
Урук сөөртүр
Оолдуг болзун!
Орайындан Очур-Маанай бодаразын,
Бажындан Мага-Кала бодаразын!
Назыны узун болзун,
Амыр-чыргалдыг болзун!
Дөңге тигер
Өглүг болзун,
Дөъшке чалаар
Малдыг болзун!
Моң ыяш эзеңгилиг болзун,
Молдурга кежи
Төрепчилиг болзун!
Хадың ыяш
Эзеңгилиг болзун,
Казыра кежи
Төрепчилиг болзун!
Чарык пажын
Чаваналап аар болзун,
Чадыр өөн
Маганалап аар болзун!
...