Тываның Камбы-ламазының дүжүлгезинге саадаарының байырлыг езулалы Улусчу чогаадылга бажыңынга болган. Ол сарыг шажынның бо езулалды эрттирериниң шупту чаңчылдары езугаар болган. Камбы-лама албан-дужаалдың демдээ — лотос чечек хевирлиг бөрттү Лопсан Гьятсога кедирип, ону дүжүлгезинге олурткан соонда, республикада сарыг шажынның чүдүкчүлеринге ол бады даңгыраан берип, Тывага сарыг шажынны ам-даа хөгжүдеринге, ол кижилерниң мөзү-шынарынга, амыдырал-чуртталгазынга чаагай салдарлыг боорунга бүгү сагыш-сеткилин, эртем-билиин бараалгадырын даңгыраглаан.
Лопсан Гьятсонуң Тываның Камбы-ламазының дүжүлгезинге саадаарының езулалы эрткен соонда ооң мурнунда Тываның Камбы-ламазының албан-дужаалын ээлеп чораан ламалар аңаа байырны чедирип, ооң чаагай үүлези бүдүнгүр болурун күзеп, байырны чедиргеннер.
Лопсан Гьятсонуң Тываның Камбы-ламазының дүжүлгезинге саадааны-биле Тываның Баштыңы Шолбан Кара-оол аңаа байырны чедиргеш, бистиң республикага амыр-тайбың чорук нептереп, тыва чоннуң сагыш-сеткили, мөзү-бүдүжү сарыг шажын чүдүлгезиниң ачызында улам-на чаагай болурунга, Тываның хөй национал, аңгы-аңгы чүдүлгелерлиг чоннарының аразынга бот-боттарын билчир чорук, оларның аразында эп-найырал быжыг боорунга бүгү-ле күжүн чаа Камбы-лама бээр деп бүзүрелин ол илереткеш, амы-хууда белээн сөңнээн.
Православ шажынның Кызылда болгаш Тывада епископу Феофан база Лопсан Гьятсонуң Тываның Камбы-ламазының дүжүлгезинге саадааны-биле байыр чедирип, православ болгаш сарыг шажыннар Тываның бүгү чоннарының чаагай сагыш-сеткили, оларның аразында эп-найыралы, быжыг деми дээш кады ажылдаар дээрзинге чайгылыш чогун илереткен.
Сарыг шажынның Санкт-Петербург хоорайда хүрээзиниң Камбы-ламазы Бадмаев, Бурятияның сарыг шажынның Камбы-ламазы Дагба Очиров олар база хөй санныг чүдүкчүлер Тываның чаа Камбы-ламазынга байырны чедирип, сарыг шажынның чаагай өөредиин чүгле Тывага эвес, бүгү Россияга нептередиринге үлүүн киирип, ооң-биле бистиң чуртувус амыр-тайбың боорунга ачызы улуг болзун деп йөрээгеннер.
Лопсан Гьятсонуң хамааты документ езугаар адын Байыр Серенович Шыырап дээр. 1976 чылда Тере-Хөл кожууннуң Кунгуртуг суурга төрүттүнген. Кызылда Дхарма төпке ийи чыл иштинде өөренген. Ооң соонда Индияда Гоман хүрээзинге сарыг шажынның эртем-билиин чедип алган. 2009 чылдан Тываның Камбы-ламазынга соңгуттургуже чедир Тере-Хөл кожууннуң Тере-Хөлде «Чыргалан» хүрээзиниң ламазы чораан. Ону делгереңгей эртем-билиглиг, кижизиг мөзү-шынарлыг лама деп таныыр-билир кижилер санап турар.
Шаңгыр-оол Монгуш.
Альберт ХоМУШКУНУң тырттырган чуруу
Үндезини: http://bit.ly/1xrbxv5