"Чүткүдүп-ле олуруңар"
Өгленишкен хүнүңерде
Өөрүшкүнү күзеп тур бис!
Чалбаргылап, йөрээл салып,
Чаагай чолду оштап тур бис!
Өөрүшкүден өөскүдүңер,
"Өршээзин" деп чалбарыңар.
Өгбелерни өрү чалап,
Өөңерге киириңер.
Хайыраккан дааңарга
Ха-дуңма чонуңарга
Хамык чемниң дээжизин
Харам чокка өргүңер-ле.
Амыдырал арттарынга
Ара черле доктааваңар.
Чүү-даа чүвээ торулбайн,
Чүткүдүп-ле олуруңар.
Каалама орук чокта,
Кандыг чүве турбас дээрил:
Кадыр келзе, далашпаңар,
Кадыг келзе, харлыкпаңар.
Черле хамык чуртталгаңар
Чедиишкинниг болур болзун!
Ажыл-херек, алдыр-ат-даа,
Аас-кежик... Шупту турзун!
Иреңерде, кадаңарда
Ийи бодаар сеткил-даа чок
Силер ийи эки болза,
Силиг-ле бис, чоргаар-ла бис.
Чалбарыывыс, йөрээливис,
Чагыывыс-даа мындыг-дыр-ла
Бо-ла бүгү боттанзын дээш,
Боданып каап чоруңар че!
1990 чыл
Чооду Кара-Күске.